阿仙奴對Big 6不敗　沙列巴征服3大球場

阿仙奴今季可唔可以重奪英超冠軍仲係未知數，不過球隊嘅進步就相當明顯，尤其喺「強強對碰」嘅表現特別出色，今季聯賽10場面對傳統「Big 6」，錄得6勝4和不敗成績，中堅威廉沙列巴今場獲選全場最佳球員(MOTM)，今季先後喺晏菲路球場、曼城球場同奧脫福球場得獎，遇強愈強。

阿仙奴今仗成功「雙殺」曼聯，對曼城、利物浦、熱刺同車路士都有1勝1和成績，10場「Big 6」大戰搶走22分，其中作客曼城、利物浦同曼聯3場惡戰，阿仙奴只係失過1球，法國中堅沙列巴3場都獲得MOTM獎項。事實上，阿仙奴今季失球數字全英超最少，23歲嘅沙列巴喺37場聯賽踢足3,330分鐘，躋身英超頂尖中堅行列。

沙列巴賽後表示：「今場喺奧脫福好難踢，我哋踢得唔係咁好，但當球隊踢得唔順，就更加要保持堅強，我哋唔想失分，球隊展現出堅固防守，唔單止係後防嘅功勞，中場同前鋒一樣好幫手。有一班隊友共同努力，我更加容易發揮自己嘅能力。」