唔用直升機運送　英超獎盃煞科日去邊度？

英超冠軍誰屬要到煞科戰先可落實，今季只係英超史上第10次鬥到最後一輪先決定冠軍。雖然曼城掌握主導權形勢大好，但阿仙奴數字上仍有機會奪冠，據英國《每日郵報》報道，英超賽會將喺兩個球場安排相同嘅捧盃準備，一視同仁。

煞科日曼城主場對韋斯咸，阿仙奴就主場對愛華頓，兩個球場相距198英里，咁冠軍獎盃係咪應該擺喺大機會捧盃嘅曼城主場呢？早前有傳聞話，獎盃會喺「中間點」待命，冠軍出現後就由直升機運去。不過據英國傳媒爆料，原來英超賽會一直擁有2隻一樣嘅冠軍獎盃，一隻係存放喺倫敦總部，一隻就由上季冠軍球隊保管，周日(19日)煞科戰，兩隻獎盃同40面獎牌、相同嘅舞台同煙花都會喺兩個球場候命。

根據英超規例，全季聯賽上陣5場或以上嘅球員，都合資格領取冠軍獎牌，曼城同阿仙奴今季都各有21個球員合乎資格拎獎。