廠迷死心　莫耶斯：我哋連曼城U14都頂唔住

今季英超冠軍誰屬，要等煞科日曼城主場對韋斯咸，同埋阿仙奴主場對愛華頓戰果先知，阿仙奴要捧盃除咗自己要贏，仲要寄望韋斯咸阻止曼城贏波，不過韋斯咸主帥莫耶斯已經畀咗答案，佢話：「就算佢哋派U14，我哋都阻止唔到。」

韋斯咸不但左右冠軍誰屬，同時亦係莫耶斯卸任領隊嘅告別戰，不過佢上場領軍3比1擊敗盧頓，已經喺主場光榮謝幕，今場只能盡力而為。

嚟緊作客曼城，莫耶斯講笑咁話：「我認為好難阻止佢哋(曼城)捧盃，就算佢哋派U14，我諗大家都明白，我同球員講，會盡一切努力做到職業操守，我只能咁做，盡力做到最好。」

巧合嘅係，10年前嘅英超煞科戰同今季非常相似，當年係由曼城同利物浦鬥到最後一輪，曼城煞科日主場對手同樣係韋斯咸，結果曼城主場贏2比0，順利捧盃。