荷蘭公布30人初步名單　34歲白蘭特有份

荷蘭國家隊主帥朗奴高文公布出戰今屆歐國盃嘅30人初步名單，加普、華基爾雲迪積克、尼敦阿基、迪比、法蘭基迪莊等主力都有入選，連帶34歲「再生戰士」戴利白蘭特亦有份，成為陣中唯一累積上陣超過100次嘅球員。

朗奴高文關照唔少老將，除咗效力西甲神奇球隊基羅納嘅戴利白蘭特之外，已去沙特搵食嘅33歲中場韋拿杜姆，同樣33歲阿特蘭大中場迪魯恩，32歲國際米蘭中堅迪維積都榜上有名，配合年輕當打嘅沙維西蒙斯、當耶爾馬倫，人腳相當完整。

此外，協助利華古遜捧今季德甲冠軍嘅謝利美費林邦有入選，令人充滿期待，呢位23歲右翼衞今季聯賽入9球及7次助攻，表現光芒四射，即使朗奴高文曾批評佢防守能力弱，但都係向現實屈服，徵召謝利美費林邦。不過，今季喺博洛尼亞有出色表現嘅射手約舒亞舒克斯落選。

至於今季為阿特蘭大射入15球嘅中場古普美拿斯亦係「橙衣兵團」另1位奇兵。朗奴高文之後會將30人名單縮減至26人參賽。