戒賭成功？法基奧利今晚復出

球迷要留意，周二凌晨(21日)意甲祖雲達斯作客博洛尼亞，因賭波被罰停賽12個月嘅法基奧利，佢個名出現喺祖記名單上，亦即表示佢已經坐完波監，可以重返球場。

意大利今季爆出賭波醜聞，多位球員被揭發賭波而被罰停賽，包括已轉投紐卡素嘅辛度東拿利，而祖記嘅法基奧利亦被重罰停賽12個月，由去年10月初開始執行，佢對上一次比賽係10月1日對阿特蘭大。

不過呢位「賭仔」實際上只係停賽7個月就復出，因為有5個月可以改以其他條件代替，例如參加「賭博風險教育」，亦即戒賭課程，只要被評估為戒賭成功，就可復出比賽。

在「出冊」前夕，呢位23歲中場喺社交網上載蛋糕相，慶祝自己復出；法基奧利係祖記青訓出身，在1隊上陣兩季，嚟到今季就出事，至於佢仲會唔會再犯，就要慢慢觀察。