震驚！拜仁正式斟介英超「降班領隊」

德甲班霸拜仁慕尼黑今季「四大皆空」，物色新教練嘅計劃亦狂食檸檬，估唔到近日出現驚人名字，據Fabrizio Romano同多間德國媒體爆料，拜仁睇中英超降班球隊般尼嘅主帥高柏尼，並且已經展開接觸，令球迷大感震驚。

拜仁斟介沙比阿朗素、拿高斯文、蘭歷克等失敗後，早前盛傳同杜曹傾續約，但權威記者Romano周二(21日)爆料：「拜仁有幾個英超領隊目標，高柏尼係其中之一。據悉拜仁高層已經親自致電，高柏尼持開放態度，時間尚早但佢肯定係目標之一。」德國《天空體肯》記者Florian Plettenberg亦確認呢個消息。

38歲嘅高柏尼師承哥迪奧拿，球員生涯曾喺德甲效力漢堡2年，雖然今季執教般尼降班收場，但佢嘅進攻風格仍獲肯定。對於斟介高柏尼嘅傳聞，拜仁榮譽會長漢尼斯就回應：「高柏尼？你哋(記者)每日掟個新名出嚟，唔使啦，我哋中堅有馬菲斯迪歷特同艾歷迪亞已經足夠。」高柏尼球員時代踢中堅，漢尼斯「玩嘢」回答成功避開敏感問題。