荷蘭30人名單　前鋒線唔夠班

「無冕之王」荷蘭公布歐國盃30人初選名單，所有孭飛球星都在防線，中前場則星味欠奉，反映荷蘭自上屆歐國盃嘅青黃不接問題仍然持續，同大眾期望嘅「全能足球」仲有一段距離。

今次點兵，荷蘭後防線仲見得吓人，華基爾雲迪積克、尼敦阿基、馬菲斯迪歷特、杜費斯、雲迪尹等人，個個獨當一面，防守力仍屬頂級。

不過由中場開始，只得一個法蘭基迪莊坐鎮，其餘人腳都唔夠班，多數來自荷甲本土，又或4大聯賽嘅後備，例如前鋒線孭重飛仍然係迪比拍加普，今屆賽事嘅入球能力令人擔心。

荷蘭在歐國盃被編入D組，對手有法國、奧地利、波蘭，由於仲有4個最佳第3名位置可出線，相信打入16強應該問題不大。

荷蘭歷來唯一一個國際大賽冠軍1988年歐國盃冠軍，當年主辧國係西德，今屆賽事再度由德國主辦，不過以荷蘭現時人腳，想重溫捧盃美夢難度極高。