加拿祖想加薪續約 美洲盃成籌碼
曼聯翼鋒阿歷真度加拿祖今季表現出色,已奠定主力地位,根據英國《每日郵報》爆料,呢位19歲新星希望把握為阿根廷出戰今屆美洲國家盃,爭取國際賽戰績,為提出加薪續約,增添談判籌碼。
阿歷真度加拿祖上年4月續約至2028年6月,周薪僅為5萬鎊(約49.6萬港元),遠低於其他主力。睇番呢位翼鋒今季為曼聯各項賽事上陣49場入9球,比賽次數甚至多過隊長般奴費南迪斯,並有37場擔任正選。
據悉加拿祖嘅經理人團隊認為呢位新星應該獲得「主力薪酬」,計劃向會方提出加薪,特別係如果加拿祖喺今屆美洲國家盃保持水準,協助阿根廷取得佳績,就有更大籌碼要求曼聯提升待遇,今屆美洲國家盃將於6月20日至7月14日喺美國舉行。
不過,曼聯考慮到拉舒福特等主力,以往高薪續約之後,表現就走下坡,會否答應加拿祖要求,實屬疑問。