意大利公布30人名單　4位冠軍功臣遭棄用

意大利國家隊主帥史巴列堤公布備戰下月歐國盃決賽周嘅30人初選名單，最令人意外係4位上屆奪冠功臣恩莫比尼、杜文尼高貝拉迪、文路爾盧卡迪利、史賓亞蘇拿都落選。反觀，從未有國家隊上陣經驗嘅維羅納中場科羅倫素、博洛尼亞中堅卡拉科利獲得徵召。

史巴列堤上年8月接替前主帥文仙尼之後，銳意為球隊換血，多位上屆冠軍隊成員無緣今次初選名單，取而代之揀選多位「00後」後起之秀，包括拖連奴中場森梅利列斯、後衞比拿路華、阿特蘭大中堅史卡維尼、祖雲達斯後衞安達臣甘比亞素。

最估唔到係法基奧利都榜上有名，呢位23歲祖記中場因為違規賭波，上年10月被罰停賽7個月，直至上輪意甲先至復出，卻獲得史巴列堤垂青。

意大利之後會剔除4位球員，制定26人最終名單出戰歐國盃，呢支衞冕球隊抽入B組，同組對手包括西班牙、克羅地亞、阿爾巴尼亞。