沙加重炮破咒　利華古遜歷史性做雙冠王

利華古遜喺歐霸盃決賽飲恨後，周日(26日)凌晨德國盃決賽重振雄風，憑格列沙加重炮一箭定江山，1比0擊敗凱沙羅頓捧盃，打破球隊「決賽5連敗」魔咒，同時實現利華古遜史上首次「雙冠王」(德甲+德盃)偉業。

利華古遜技高一籌，16分鐘格列沙加禁區外勁射先拔頭籌，但完半場前有哥蘇奴2黃1紅被逐。踢少個嘅利華古遜下半場雖然受壓，但仍然力保勝局至完場，繼1993年後第2度捧走德盃冠軍。事實上，利華古遜創會120年來，只係贏過4個冠軍，其中2個就係今季史無前例嘅「雙冠王」。

教練沙比阿朗素賽後表示：「我覺得好光榮，球隊值得做雙冠王，今季係一個大成功嘅故事，我需要多啲時間去欣賞呢個咁成功嘅球季，依家係享受嘅時候，每個球員都做好自己嘅本份，呢個我認為係相當重要。」利華古遜今季各項賽事53場有52場不敗，唯一敗仗就係歐霸盃決賽。