修咸頓落實簽曼城新星　蘭斯達爾喬裝加盟？

修咸頓闊別1季後重返英超，升班資格到手後即時落實夏天第1單交易，以2,000萬鎊轉會費買斷曼城新星哈活比里斯。修咸頓喺升班附加賽決賽，更有「神秘人」現身撐場，阿仙奴門將蘭斯達爾喬裝入場睇波，而且仲同「聖人」球迷一齊慶祝，令佢可能加盟修咸頓嘅傳聞出現。

修咸頓今季有唔少借將，包括紐卡素嘅賴恩費沙、般尼茅夫嘅大衞布魯克斯、韋斯咸嘅當尼斯同曼城嘅哈活比里斯等等，其中哈活比里斯借用合約中列明，如果修咸頓升班，就必須用2,000萬鎊將佢買斷。22歲中堅哈活比里斯今季喺修咸頓必然正選，聯賽有43次正選上陣，表現受到好評。

阿仙奴門將蘭斯達爾今場意外現身，而且佢仲喬裝成《哈利波特》入面嘅海格造型，坐喺修咸頓球迷區睇波，贏波後又同球迷一齊瘋狂慶祝。蘭斯達爾今季喺阿仙奴淪為2號門將，盛傳夏天將會離隊，今次現身令佢被傳可能轉投修咸頓。不過英國傳媒報道，修咸頓無意花重金簽新龍門，蘭斯達爾今次入場，只為支持昔日般尼茅夫隊友大衞布魯克斯。