麥堅拿拒教曼聯　將續約葉士域治

盛傳曼聯有意邀請葉士域治領隊基蘭麥堅拿回巢執教，但根據《The Athletic》爆料，呢位38歲少帥已經拒絕成「魔」，並準備同葉士域治續約。

曼聯計劃換帥，可能炒主帥坦哈格，基蘭麥堅拿屬於新帥人選之一，呢位「少壯派」教頭協助葉士域治獲得今季英冠亞軍，下季可以升上英超比賽，教波能力備受認同，而且佢曾經擔任前曼聯領隊摩連奴及蘇斯克查嘅助教，熟悉曼聯文化及運作，所以紅魔鬼方面認為佢係取代坦哈格嘅合適人選。

不過，基蘭麥堅拿認為自己仲未係時候回歸曼聯，消息人士指佢擔任曼聯助教期間，曾經遭隊內球星質疑其訓練方法，令佢有所顧忌，希望先喺英超取得成績，證明自己能力，否則即使返回曼聯，亦難以服眾。

因此，基蘭麥堅拿決定將會同葉士域治續約，早前有傳另一支英超豪門車路士亦打算聘請基蘭麥堅拿執教，但之後轉移目標斟李斯特城領隊馬利斯卡，就知道基蘭麥堅拿無意離開葉士域治。