雙紅爭奪森林中堅　佢係「新堤亞高施華」

根據《Football Insider》爆料，英超「雙紅」曼聯及利物浦不約而同睇中諾定咸森林中堅梅里路，森林方面趁機開天索價，要求4,000萬鎊(約4億港元)轉會費，等於一年前買入價嘅4倍。

梅里路上年夏天以1,200萬歐元(約1億港元)向巴甲球隊哥連泰斯收購梅里路，呢位21歲中堅迅速適應英超比賽節奏，上陣32場聯賽，平均每場有1.56次搶截、5.69次解圍，並貢獻2次助攻，加上速度快，傳球能力出色，備受睇好可以成為另一位堤亞高施華，因而吸引曼聯及利物浦關注。

曼聯今季防線經常出現傷兵，加上華拉尼今夏離隊，急需要簽入中堅，曼聯新股東拉特克利夫只想簽25歲以下球員，年輕當打嘅梅里路無疑係合適人選。至於利物浦亦有意收購中堅，將來接替32歲老將華基爾雲迪積克，「雙紅」勢必展開搶人才大戰。

諾定咸森林因為財政違規，今季英超被扣4分，為免再遭處罰，需要出售球員整靚盤數，曼聯或者利物浦如果出到4,000萬鎊，森林應該會放人。