土耳其絕代雙驕　耶迪斯唔差過古拿

土耳其喺今屆歐國盃嘅表現備受期待，因為佢哋有唔少天才冒起，19歲嘅艾達古拿季尾喺皇家馬德里大爆發，贏到唔少粉絲；其實效力祖雲達斯嘅19歲前鋒基倫耶迪斯，今年喺意甲亦大放異彩，據報祖雲達斯即將同佢續約，仲答應畀佢畀繼續10號波衫。

耶迪斯2年前由拜仁慕尼黑青年軍轉投祖記，上年底獲提拔上一隊後坐火箭上位，各項賽事上陣32場攻入4球，新教練莫達已將佢列為3個「非賣品」之一。據報耶迪斯已同意續約至2029年，祖記更答應畀佢繼承巴治奧、迪比亞路等着過嘅10號波衫。祖記目前「掛名」10號球員，係正坐4年波監嘅保羅普巴。

土耳其領隊蒙迪拿對耶迪斯亦有好高期望：「耶迪斯係個好聰明嘅細路，佢好大機會喺未來一段長時間位處頂尖，依家開始佢要改變自己嘅思維，要學識點樣處理成功同期望，展開另一段截然不同嘅足球生涯。」