盧卡古慘成「人球」　或轉投AC米蘭

盧卡古上年夏天被車路士外借去羅馬1季，借用期今夏屆滿，由於車仔無意收回呢位31歲比利時前鋒，計劃再次將佢外借，甚至出售。根據《天空體育》爆料，AC米蘭希望借用盧卡古，代替離隊嘅基奧特。

盧卡古今季為羅馬上陣47場入21球，表現不俗，但羅馬財政欠佳，無力再負擔呢位前鋒高昂人工，預料唔會續借，佢惟有焗住返車路士，等下一站去處。最新消息指AC米蘭計劃借用佢，其實A米上年夏天曾經同車仔傾借用盧卡古，但未能成事，隨住射手基奧特今夏約滿離隊，A米急需簽入前鋒填補空填，盧卡古無疑係合適人選，畢竟佢效力羅馬、國際米蘭期間，有出色表現，足以代替基奧特嘅角色。

除咗AC米蘭之外，拿玻里亦打算簽入盧卡古，但必須落實出售射手域陀奧森漢之後，先至會收購盧卡古。