【有片】美斯回歸 阿根廷1比0贏厄瓜多爾
正準備美洲國家盃嘅阿根廷，周一(10日)朝早喺熱身賽1比0贏厄瓜多爾。「球王」美斯時隔半年後再為阿根廷披甲，後備上陣表現唔差，另一老將迪馬利亞就攻入全場唯一入球，阿根廷要爭冠靠晒呢2位老將。
美斯因傷缺陣3月份2場熱身賽，今場喺芝加哥上演嘅賽事，美斯就先任後備，不過阿根廷依然佔盡優勢，40分鐘基斯甸羅美路助攻交，禁區頂一控一傳交出靚助攻，迪馬利亞入楔窄位射入。美斯喺56分鐘後備登場亦創造唔少機會，可惜隊友未能把握，最後小勝1比0。
迪馬利亞今場攻入第31個國家隊入波，追平希古恩排阿根廷史上入球榜第5位，落後第4位嘅馬納當拿4球。迪馬利亞賽後表示：「厄瓜多爾係我哋喺美洲盃有機會遇到嘅球隊，今場係證明自己嘅好機會，大家都有準備知道美洲盃會好難踢，最重要係球隊齊心完成目標。」