比利時後防危機　梅尼亞受傷或被撤換

比利時喺歐國盃前爆出後防危機，上場3比0贏盧森堡嘅熱身賽，後防梅尼亞只係踢咗16分鐘就傷出。比利時足總證實呢位32歲老將，唔會隨大軍喺周三(12日)出發去德國，而會繼續留喺比利時進行測試，領隊泰迪斯高指梅尼亞傷勢並唔樂觀。

泰迪斯高表示：「梅尼亞好失望，我哋都好失望，依家唔知傷勢點樣，但係睇嚟就好嚴重，佢覺得膝頭有啲嘢而且覺得好痛。梅尼亞一直都係樂觀嘅人，而且非常專業，希望會得到個好好嘅結果，但目前真係唔太樂觀。」

更大問題係，比利時已經選入維頓漢同艾法菲亞迪2個受傷嘅守將，泰迪斯高表明就算2人趕唔切喺首場分組賽上陣，都會保留佢哋喺陣中。歐洲足協容許球隊喺首場分組賽前「因傷換人」，所以比利時要喺下周二(18日)對斯洛伐克前，決定係咪搵人頂替梅尼亞。