臨開波再出事　荷蘭又有中場猛將因傷退隊

歐國盃將於周六(15日)凌晨揭幕，爭標份子荷蘭再受打擊，繼法蘭基迪莊傷勢未愈退隊之後，另一位中場古普美拿斯亦因傷緣盡今屆賽事，領隊朗奴高文已經補選多蒙特翼衞伊恩馬特臣填補空缺。

據悉古普美拿斯上場熱身賽對冰島，開波前進行熱身活動期間受傷，經過評估之後，證實呢位26歲中場全能戰士無法參加今屆歐國盃。古普美拿斯今季表現出色，為阿特蘭大各項賽事上陣51場入15球，成為球隊奪得歐霸盃嘅功臣。

古普美拿斯獲得曼聯等大球會垂青，佢無緣歐國盃，對於個人事業及荷蘭爭標都係一次重要打擊。至於獲補選嘅伊恩馬特臣原本都有份入選30人初步名單，但早前被剔出最終26人名單，依家失而復得。

荷蘭現時大軍名單只有25人，朗奴高文可能會再補選多1人，荷蘭位處歐國盃D組，將於周日(16日)晚首場分組賽對波蘭，之後對法國、奧地利。