德國臨開波再轉人　安利簡恩獲補選

歐國盃揭幕戰星期六(15日)凌晨展開，德國開波前突然再有名單變動，中場阿歷山大柏夫洛域因傷退隊，領隊拿高斯文即時宣布補選30歲嘅安利簡恩。

效力拜仁慕尼黑嘅阿歷山大柏夫洛域，近日受到扁桃腺發炎困擾，原本諗住頂埋個歐國盃先做手術，但德國足總周三(12日)作出換人決定，由多蒙特中場安利簡恩取代。

拿高斯文喺補選後表示：「我哋需要另一個6號球員，所以召入安利簡恩，佢亦即時表達願意加入大軍，佢有豐富經驗，而且識得應付壓力，係個合適人選。」

不過安利簡恩上季喺多蒙特狀態一般，有球迷認為拜仁嘅哥列斯卡，或者近2個星期一直跟國家隊陪練嘅小將洛高列斯更加值得入選。