揭幕戰最大勝利　卻奧斯99%傳球成功率主宰德國

德國喺歐國盃旗開得勝，5比1贏蘇格蘭更創下歐國盃史上揭幕戰最大勝利，打破上屆意大利3比0贏土耳其嘅紀錄。決賽周後將會退休嘅中場卻奧斯，繼續交出「大師級」表現，佢今場雖然冇入波或助攻，但全場102次傳送只係傳失過1球，99%傳球成功率創下歐國盃歷史紀錄，主宰德國嘅攻守命脈。

早前協助皇家馬德里贏歐聯冠軍嘅卻奧斯，出色狀態延續到國家隊，德國開紀錄一球就係由佢精彩轉邊開始。呢位34歲老將喺後場從容發板，全場有8次長傳、14次傳入核心地帶、創造4次機會，合共102次傳球有101次成功，99%成功率係自1980年有紀錄以來，歐國盃單場100+傳球嘅最高成功率。

卻奧斯賽後表示：「我哋做到要做嘅嘢，全場冇畀蘇格蘭任何機會，第1場就贏波會畀到球隊信心，當然對手唔喺最佳狀態。我唔敢講德國第1場波已經上力，下場對手會比蘇格蘭更難應付，如果一樣可以踢出今場表現，先再講上力嘅話題。」德國喺第2場分組賽將會對匈牙利。