歐洲足協破例豁免　曼聯尼斯可一齊踢歐霸盃

歐洲足協正式確定，同屬英國富豪拉特克利夫旗下球會曼聯、尼斯符合資格，可以一齊參加下屆歐霸盃。與此同時，由城市足球集團擁有嘅曼城、基羅納亦可以攜手出戰下屆歐聯。

根據歐洲足協規則，禁止同一班主旗下兩支球隊參加同一賽事，以避免互惠互利及操縱賽事等嫌疑。拉特克利夫旗下英力士集團2019年收購尼斯，加上「拉Sir」年初收購曼聯25%股份，曾盛傳曼聯、尼斯唔可以一齊踢下屆歐霸盃，根據原本規定，尼斯法甲排第5位，曼聯英超排第8位，紅魔鬼需要「降格」轉戰歐協聯。

歐洲足協經過研究之後，最終願意破例作出豁免，所以曼聯同尼斯有機會喺下屆歐霸盃「兄弟相殘」。上季西甲爆冷獲得季軍嘅基羅納亦成為得益者，可以同「大佬」曼城一齊出戰歐聯。

不過，歐洲足協亦作出限制，曼聯同尼斯喺明年9月之前，唔可以有球員交易、技術、商業等合作，曼城同基羅納亦受同樣規限。