阿迪達願破例　簽入西班牙晉級4強功臣　

米基爾馬連奴今屆歐國盃表現唔錯，對德國嘅8強賽事，仲喺加時階段頂入絕殺一球，帶領西班牙晉級4強。據悉，英超阿仙奴主帥阿迪達有意喺今夏打破球隊年輕化政策，破例簽入依名28歲中場。

米基爾馬連奴目前效力西甲皇家蘇斯達，屬於球隊主力，上季各項賽事上陣45場，攻入8球、交出5次助攻。佢喺今屆歐國盃暫時6場都有份上陣，當中最令人印象深刻當然屬於8強對德國，喺補時119分鐘頂入致勝球，幫西班牙險勝2比1晉級。據報阿仙奴主帥阿迪達相當欣賞依位西班牙國腳嘅「天賦」同「身體素質」，所以希望打破近年只收購年青球員嘅慣例，嘗試簽入馬連奴。

馬連奴2017/18球季曾短暫效力紐卡素，所以對英超並唔陌生，而佢近日亦有對其轉會傳閒作出回應：「身為足球員，你永遠不知道自己的未來，但我不太重視謠言，因為歐國盃是我現在面對最重要的事情，需要100%的注意力。當歐國盃結束後，我才會與球隊會面。」