艾雲東尼缺陣傾轉會　轉戰沙特好事近！

賓福特周日(18日)英超主場2比1贏水晶宮，王牌前鋒艾雲東尼意外冇份進入大軍名單，領隊法蘭克賽後證實「傾緊轉會」，消息指沙特豪門吉達艾阿里首次開價被拒，但雙方都想促成交易，預計可以喺轉會窗關閉前達成共識。

艾雲東尼只剩1年合約而且拒絕續約，賓福特已準備將佢賣走，對水晶宮未被列入大軍名單後，法蘭克表示：「東尼依家有好多嘢發生緊，尤其係轉會，所以我哋決定唔使佢踢。依家仍未有任何協議，但希望好快會有。東尼係個神奇球員，但賓福特已證明就算冇咗佢，一樣可以成功。」

據報依家斟介嘅球會係吉達艾阿里，呢支沙特勁旅首度開價3,700萬鎊被賓福特拒絕，有傳賓福特索價6,000萬鎊，不過兩會仍然繼續商討。28歲嘅艾雲東尼同屋企人亦未為呢次轉會作出最後決定，呢位英格蘭國腳首選係留喺英超，但至今未有球隊出手斟介。