麥巴比起孖開齋　皇馬獲21世紀第2000分

周一(2日)凌晨西甲，皇家馬德里主場以2比0擊敗貝迪斯，巨星基利安麥巴比包辦2個入波，呢位25歲法國前鋒今季加盟「銀河艦隊」後，踢到第4場聯賽，終於首嘗西甲入波滋味，皇馬贏波全取3分，成為踏入21世紀以來，首支累積2000分嘅西甲球隊，令「麥總」入波別具意義。

基利安麥巴比自從8月中歐超盃對阿特蘭大入波後，首3場西甲都食白果，被批評名過其實，甚至傳出遭隊友孤立，唔傳波畀佢。基利安麥巴比今場以行動證明身價，踢到67分鐘，費達歷高華維迪後腳妙傳，麥巴比反應快，衝前射入打破入球荒。

8分鐘之後，雲尼斯奧斯祖利亞殺入禁區，遭對手門將雷爾施華撲跌，球證判罰12碼，基利安麥巴比主射入網，奠定2比0勝局。麥巴比今場有9次射門，3次中目標有2球進帳，佢踢4場西甲累積26次射門僅入2球，仲需要提升入球率。

皇馬今季聯賽4戰2勝2和，落後榜首巴塞隆拿4分。