皇馬斟阿諾特遇阻　改搶熱刺右閘

皇馬右後衞丹尼爾卡華積早前受重傷，需要長抖8至10個月，會方計劃簽入右閘，原本首選利物浦主將阿歷山大阿諾特，但呢位英格蘭國腳可能選擇續約，「銀河艦隊」轉移目標，改為斟介熱刺右閘柏度樸路。

現年25歲嘅柏度樸路近2季已奠定熱刺主將地位，表現愈來愈出色，近2場歐國聯亦頂替丹尼爾卡華積，以正選身份為西班牙披甲，上場對塞爾維亞，貢獻1次助攻，踢法瞻前顧後，吸引皇馬注意。

柏度樸路對於獲皇馬垂青，感到非興奮，揚言願意上「艦」：「如果有機會加盟皇馬，我會毫不猶豫接受，近幾年累積嘅比賽經驗，令我可以接受任何挑戰。」柏度樸路出身於基羅納青年軍，其後效力過曼城、士砵亭等球隊，加上佢係西班牙人，自然希望衣錦還鄉，成為皇馬球員。