【官宣】文仙尼被炒　獲2.5億「肥雞餐」

沙特阿拉伯足總正式宣布同國家隊主帥文仙尼解約，結束僅14個月賓主關係，據悉呢位59歲意大利名帥獲得3,000萬歐元(約2.5億港元)賠償金，即使被炒都係「大贏家」。

文仙尼上年8月突然辭去意大利主帥職位，跳槽擔任沙特阿拉伯領隊，獲得2,500萬歐元(約2.1億港元)年薪，但成績令人失望，率領沙特阿拉伯踢18場比賽，只取得7勝5和6負，包括今年1月亞洲盃16強出局，期間更發生同球員不和事件。

沙特阿拉伯喺上場世界盃外圍賽亞洲區第3圈C組打和巴林0比0之後，4戰僅1勝，當時已傳出文仙尼將會被炒，現時終於落實，沙特傳媒指佢獲得3,000萬歐元賠償金。沙特阿拉伯足總將於稍後時間公布新領隊人選。