烏龍+12碼+紅牌　英超黑仔王食「災難全餐」

今季重返英超嘅葉士域治，周六(26日)作客賓福特戲劇性輸3比4，首次喺英超擔正嘅守將哈利奇勒，慘成「災難片」主角，佢今場分別擺烏龍、輸12碼同食紅牌，成為球隊輸波頭號罪人。

葉士域治今場派出23歲嘅哈利奇勒擔正，係佢職業生涯首次喺英超正選上陣。早段葉士域治領先2球，以為順風順水，但44分鐘被賓福特追番1球後，臨完半場哈利奇勒飛身解圍，不幸將個波撞入自己龍門，幫主隊追成2比2。

哈利奇勒下半場黑氣持續，51分鐘禁區內拉跌對手輸12碼，麥比奧莫操刀為賓福特反超前；69分鐘哈利奇勒禁區頂踢跌對手，兩黃一紅被逐。踢少個嘅葉士域治86分鐘一度追平3比3，但麥比奧莫補時6分鐘入波，為賓福特全取3分。

擺烏龍、輸12碼兼食紅牌嘅「全餐」，原來哈利奇勒唔係第1個品嚐，修咸頓中堅碧拿歷克喺2021年成為英超首個食「災難全餐」球員，修咸頓當時慘吞曼聯9蛋。