坦哈格被炒後首度現身　準備返荷甲搵食？

坦哈格上月底被曼聯炒魷之後，終於首度現身，被傳媒影到入場睇周日(3日)凌晨舉行嘅荷甲荷華高斯主場對NAC，令人懷疑呢位54歲荷蘭名帥準備重返荷甲搵食。

坦哈格早前向曼聯球迷發出公開信，答謝球迷一直以來嘅支持，表示會「永遠珍惜2個冠軍」，並指被曼聯炒魷係「夢想結束」。呢位光頭名帥現時身處荷蘭，好有閒情逸緻入場睇波，但並非捧前度執教球隊阿積士場，而係去睇荷華高斯主場對NAC。

坦哈格大駕光臨，荷華高斯球員「受寵若驚」，落力演出最終贏2比0。荷華高斯今季成績欠佳，踢11場聯賽只有3勝3和5負，難怪唔少網民認為坦哈格可能會接手執教。