曼聯超新星全面復操　對葉士域治出得

曼聯今季耗費5,200萬鎊(約5.1億港元)從里爾簽入嘅19歲法國新星蘭尼約路，據報已經全面在一隊復操，周日對葉士域治有機會上演「地標戰」，成為新帥魯賓艾摩廉手上爭勝武器。

曼聯簽入蘭尼約路一度同皇馬拗手瓜，最終球員揀咗曼聯，加盟時只得18歲，轉會費5,200萬鎊，計埋浮動條款高達6,700萬鎊(約6.6億港元)，但不幸喺季前熱身賽期間受傷，蹠骨骨折要做手術，抖到依家終於重返一隊操練。

蘭尼約路原本要在上周中為曼聯U21上陣，但賽前被剔出比賽名單，重返一隊正式全面投入訓練，並獲告知嚟緊對葉士域治將會披甲，在艾摩廉343體系中擔任右中堅。

英國傳媒報道，魯賓艾摩廉本周開始主持操練，發現曼聯陣容臃腫，個別球員缺乏速度及強度，表現在水準以下，操練中佢頻繁要求球員加快節奏，估計有部分球員將被打入冷宮，甚至被清洗，至於係邊幾個，稍後對葉士域治上陣名單出爐後可略知一二。