阿仙奴大破森林止頹勢　17歲新星創20年紀錄

連續4場聯賽不勝嘅阿仙奴，周日(24日)凌晨英超主場3比0大破諾定咸森林，令佢哋成為英格蘭足球史上，第2支喺頂級聯賽錄得2,000場勝仗球隊(第1隊為利物浦)。17歲小將尼華尼利今場入波，亦係法比加斯後阿仙奴最年輕入球者，前途無限。

阿仙奴今場收起夏維斯、迪格蘭賴斯等主力，不過仍然控制大局，布卡約沙卡15分鐘禁區內狂抽掛網先開紀錄，52分鐘再助攻湯馬士柏迪轟入世界波。17歲中場尼華尼利尾段落場，立即接應史達寧傳中快腳射入，助阿仙奴大勝3比0完場。

尼華尼利今季喺英聯盃已入3球，今次係佢英超首個入波，係自2004年嘅法比加斯後，阿仙奴喺英超最年輕入球者(17歲247日)。阿仙奴領隊阿迪達賽後表示：「我要為尼華尼利職業生涯負責，所以要一磚一木咁去搭建，今日佢又起多一層。相信我，一次過砌5塊磚係唔得，鞏固嘅工作係好重要！」