「新沙拿」狂入波　成3大豪門爭奪目標

周一(2日)凌晨德甲，法蘭克福作客以4比0大勝海登咸，排第2位，僅落後榜首拜仁慕尼黑4分，前鋒馬莫殊繼續有神勇演出，今仗梅開二度，成為各大豪門爭奪目標，據悉利物浦、曼聯、拜仁慕尼黑都有意收購呢位25歲埃及國腳。

法蘭克福愈戰愈勇，今仗憑馬莫殊入2球，以及法利斯查爾比、艾基迪基各建一功，贈海登咸4蛋，各項賽事7連勝，成為德甲爭標奇兵，有上季冠軍利華古遜嘅影子。

法蘭克福戰績彪炳，馬莫殊居功厥偉，佢今季聯賽有13球進帳，僅比射手榜一哥哈利卡尼少1球，同時有7次助攻屬於各球員之冠，進攻技術全面。

根據德國《天空體育》爆料，利物浦、曼聯、拜仁慕尼黑都有興趣簽入馬莫殊，特別係紅軍希望用佢代替可能明夏離隊嘅穆罕默德沙拿，兩人屬於埃及國家隊隊友，正好可以完美交接。馬莫殊現時仲有2年半合約在身，估計轉會費為4,000萬歐元(約3.28億港元)，利物浦絕對負擔得起。