古古列拿兩次跣腳讓兩球　拎波砵去堆田出氣

車路士喺英超戲劇性4比3反勝熱刺，古古列拿喺開波早段兩次跣腳，令熱刺一度領先2比0，呢位西班牙國腳要即場更換波砵，好在最終成功逆轉贏波。古古列拿賽後自貼將波砵丟落垃圾桶嘅相片，幫自己出番啖氣！

英國近期天氣麻麻，今場比賽一樣場濕路滑，4分鐘古古列拿後場拎波跣低，被對手搶走後傳中射入；7分鐘後古古列拿再喺後場解圍跣腳，被柏度樸路搶到交畀古路施夫斯基射入。嬲爆嘅古古列拿即刻去後備席更換新砵，「換鞋大法」立竿見影，17分鐘佢就助攻查頓辛祖入波，掀起反勝序幕。

賽後古古列拿喺社交網道歉「對唔住藍軍」，並且貼上一張波砵丟喺垃圾桶內嘅相片，懲罰失波嘅「罪魁禍首」。領隊馬利斯卡賽後亦借跣腳事件開玩笑：「講真，車路士仲未有能力爭標，同頂尖球隊仲有距離，阿仙奴、曼城同利物浦應該唔會好似古古列拿咁跣低。」