多蒙特借用拉舒福特　最快周四體檢

拉舒福特已被剔出曼聯出場名單，曼聯希望今個冬季轉會窗將佢出售，可惜唔成功，AC米蘭同巴塞隆拿都傾唔成，到近日，可能會外借到多蒙特，談判火速進行，不設買斷條款，據報最快周四體檢。

多蒙特去年已曾借用查頓辛祖，效果空前成功，協助球隊打入歐聯決賽，爭啲就捧盃，今季蜜蜂兵團又有新目標，睇中拉舒福特。

拉舒福特在曼聯年薪超過2,000萬歐元，半季為1,000萬歐元，多蒙特願意承擔800萬歐元人工，亦即表示承擔8成工資，只要福仔願意放棄200萬歐元人工，又或曼聯承擔餘下200萬歐元，就可成事。

不過，曼聯仲想收借用費，費用在600至800萬歐元之間，如果多蒙特答應，就會在福仔身上花費1,600萬歐元(約1.28億港元)，而且只能使用福仔半季，是否划算，由多蒙特決定。