加拿祖經理人現身車路士　醞釀驚天轉會

曼聯新星阿歷真度加拿祖成為搶手貨，意甲勁旅拿玻里正力斟佢加盟，不過轉會權威Fabrizio Romano爆料，車路士已正式提出洽購，而加拿祖經理人周二(21日)更公然喺史丹福橋球場睇波「打卡」，醞釀驚天轉會！

據報20歲嘅加拿祖係曼聯套現目標，尤其佢屬於青訓球員，轉會收入可以大大改善財政狀況，令球隊有資金收購新球員，消息指拿玻里早前出價4,000萬鎊收購被拒，曼聯要求6,000萬鎊先肯放人。 Romano隨後爆出驚人發展：「加拿祖去留係開放，拿玻里一直嘗試，干地更親自打電話畀加拿祖；車路士亦直接同曼聯斟介，預計將會有更多會談。」

車路士加入爭奪消息曝光後，加拿祖經理人迪盧卡斯再「火上加油」，周二喺IG發布自己身處史丹福橋球場，睇車路士對狼隊賽事嘅影片，呢個舉動就引嚟曼聯球迷炮轟：「如果佢去車路士，將會係史上最大背叛」、「好難相信曼聯竟然要賣走加拿祖」、「英力士(INEOS)賣走球會最佳青訓，格拉沙都冇咁衰！」