皇馬5比1炒薩爾斯堡　麥巴比破亨利紀錄

皇家馬德里喺周四(23日)凌晨歐聯，主場5比1大破奧地利勁旅薩爾斯堡，贏波後升上第16位，保持躋身前8名嘅一絲希望。法國前鋒基利安麥巴比今場又入波，更打破名宿亨利嘅歐聯入球紀錄。

皇馬火力全開，上半場祖迪比寧咸兩度助攻洛迪高高斯入波，48分鐘麥巴比搶到對方龍門腳下球射入空門，之後雲尼斯奧斯祖利亞亦梅開二度，薩爾斯堡完場前5分鐘破蛋，無阻皇馬大勝5比1。

狀態大勇嘅麥巴比連續4場入波，呢球亦係佢喺歐聯累積第51球(80場)，超越名宿亨利(50球)，僅次賓施馬(90分)成為法國史上第2多歐聯入波球員。

皇馬目前有12分，距離前8名只差1分，保住直接出線嘅機會，教練安察洛堤賽後表示：「我哋入球一向冇問題，所以我集中改善防守，最後一輪對比斯特必須贏波，到時再睇形勢，雖然入前8係非常困難。」