曼聯成「後勁王」　88+分鐘絕殺已成習慣

曼聯今季贏波次數唔多，而且近期贏親都係非常驚險，周五(24日)凌晨喺歐霸盃補時2比1絕殺格拉斯哥流浪，延續最近「絕殺潮」風氣。曼聯對上4場贏波，全部都係88分鐘之後先入致勝球，夠晒刺激！

曼聯近1個半月贏過4場，作客柏辛域陀尼亞靠海倫88分鐘絕殺贏2比1；之後作客曼城有般奴費南迪斯88分鐘追平，90分鐘再由阿密特迪亞路入波反勝；上星期英超對修咸頓，又係靠阿密特迪亞路補時連入2球贏3比1；今場對格流再憑般奴費南迪斯92分鐘絕殺。

Opta數據顯示，曼聯歷來踢歐洲賽事，第8次喺第90分鐘或補時入波致勝，絕殺次數冠絕所有英格蘭球會，阿仙奴同車路士各有7次排第2位。對於「絕殺」成為習慣，曼聯領隊魯賓艾摩廉表示：「贏波就係贏波！當我哋覺得理應贏波，突然間被追和，最後再入波感覺好正，你感受到球場嘅氣氛同聲音，非常美麗。」