華拉度列強烈指控曼城　教唆小將作反博轉會

孭住115條財務違規官司、經常被質疑轉會「出古惑」嘅英超勁旅曼城，日前再受到嚴重指控。西甲球會華拉度列發聲明，控訴曼城使橫手教唆小將艾杜萊巴亞作反，逼球會即刻將佢賣走，華拉度列表明會考慮展開訴訟。

涉案主角係18歲中堅艾杜萊巴亞，據報曼城開價675萬鎊收購被拒，但艾杜萊巴亞之後決定自掏500萬鎊買斷自己張青訓合約。華拉度列發表強硬聲明回應：「巴亞通知球會佢哋打算終止合約，咁啱之前1日曼城就正式要求我哋洽談轉會，依家巴亞決定罷操兼唔肯現身，係違反合約，我哋會尋求法律意見。」

華拉度列進一步指控曼城使橫手：「艾杜萊巴亞嘅行為，懷疑係由曼城同佢經理人支持同教唆，我哋相信係曼城建議球員行呢一條路，包括拒絕簽署財政條件更好嘅職業球員合約，目的係令華拉度列冇得選擇下就範。我哋覺得非常失望，亦會保留用法律保障球會利益嘅權利。」