沙拿轟入歐洲生涯300球　利物浦肯開新約未？

周六(1日)晚英超，榜首利物浦作客以2比0擊敗般尼茅夫，前鋒穆罕默德沙拿包辦2個入波，呢位32歲埃及國腳登陸歐洲球壇以來，各項球會賽事已累積300球進帳，包括為利物浦入235球，要求紅軍同沙拿續約嘅呼聲愈來愈大。

開賽初段，般尼茅夫創造唔少攻勢，安東尼施美安勁射中柱彈出，實在欠運，利物浦避過一劫有後福，30分鐘加普博到12碼，穆罕默德沙拿主射入網。般尼茅夫落後之下狂攻對手，馬科斯達華尼亞遠射中柱彈出，祖斯甸古華特面對空門補射，竟然唔中目標，錯失扳平黃金機會。

戰至75分鐘，穆罕默德沙拿喺禁區右路，無人看管之下射入靚波，奠定2比0勝局，取得英超3連勝，領先第2位阿仙奴9分。

沙拿梅開二度後，今季聯賽已有21球進帳，排射手榜第1位，佢將於今夏約滿，但續約問題仍然停滯不前，早前傳出利物浦願意向沙拿開出2至3年新約，但要求佢減薪，呢位神鋒已拒絕。如果沙拿繼續有神勇演出，紅軍可能會讓步，滿足佢續約要求。