法明奴遭取消註冊　步尼馬後塵？

繼尼馬之後，另1位巴西球星羅拔圖法明奴亦可能離開沙特阿拉伯球壇，呢位33歲前鋒被所屬球會吉達艾阿里取消聯賽球員註冊資格，騰出外援名額畀新加盟嘅加連奴。因此，法明奴今季餘下時間冇得踢聯賽，只能夠踢亞冠精英盃，季尾好可能離隊。

羅拔圖法明奴2023年7月由利物浦加盟吉達艾阿里，簽約3年，但表現未如理想，上季聯賽踢32場入9球，今季17次上陣只有5球進帳。吉達艾阿里早前豪花5,000萬歐元(約4億港元)收購波圖嘅巴西翼鋒加連奴，令法明奴重要性大減。

根據沙特聯賽規例，每隊最多只可以註冊10位外援，其中2人必須21歲以下，吉達艾阿里外援人數已爆滿，惟有取消羅拔圖法明奴註冊資格。

另一支沙特球隊希拉爾早前取消尼馬聯賽球員註冊資格之後，呢位33歲前鋒最終離隊，重投母會山度士，羅拔圖法明奴可能步呢位前巴西國家隊隊友後塵，返回巴甲搵食。