【多圖】英超外援救星　美女英語教師幫到你

經過冬季轉會市場之後，又有唔少新兵登陸英超，由世界各地來投嘅新外援要融入新環境，首先要學好英語。英國就有1位球星御用美女英語教師杜姬(Sara Duque)，曾經為前曼城射手祖利安艾華利斯等外國球員私人補習，因而聲名大噪。

年僅23歲嘅杜姬樣子甜美，身材仲非常豐滿，最犀利係識得多國語言，包括葡、英、德、法、西等，皆因佢成長經歷之中，曾經去過多國生活，包括童年喺比利時長大，其後去西班牙修讀大學，擁有體育心理學學位。投入社會工作後，加入葡萄牙勁旅波圖負責翻譯，跟住移居英國，開班教授英超外援英語。

此外，杜姬仲係網紅，佢嘅社交網Instagram有近40萬追隨者，並經常上載同球星合照，間接為「補習事業」做宣傳，成為英超外援最愛女教師。