阿仙奴「奇招」救亡　中場左閘推上前線

阿仙奴近期黑氣纏身，鋒線球員輪流重傷，德國箭頭夏維斯周四(13日)宣布做手術根治大腿筋傷患，今季提早收咧，連同之前宣告收咧嘅加比爾捷西斯，以及至少要抖多1個月嘅布卡約沙卡同加比爾馬天尼利，鋒線近乎無兵可用，據報領隊阿迪達將被逼推中場米基爾馬連奴同左閘基蘭泰亞尼上前線，作為救亡「奇招」。

阿仙奴4大前鋒重傷，前線「三叉戟」依家只剩史達寧、李安度杜沙特同尼華尼利3個一隊球員，連後備都冇個。報道指阿迪達將安排中後場球員頂上，好似左閘基蘭泰亞尼，早前就曾經後備上陣客串左翼，夏天將重返些路迪嘅佢，下半季好大機會要轉做「正職」左翼。

另一殺着就係中場米基爾馬連奴，呢位西班牙中場擅長走位入楔，阿仙奴有意搵佢客串中鋒位置，數據顯示佢今季英超非12碼嘅預期入球(npxG)係場均0.42球，排英超中場球員第1位，比高爾彭馬同菲爾科頓更高，推上箭頭係冇辦法之中嘅辦法。