拿玻里3連和　國際米蘭機會來了

周日(16日)凌晨意甲大戰，榜首拿玻里又保唔住勝果，作客比賽末段被拉素逼和2比2，連續3場聯賽領先之下和波收場，僅領先踢少1場嘅第2位國際米蘭2分。換言之，國米只要周一(17日)凌晨作客擊敗祖雲達斯，就可以升上榜首。

拉素要力保前4位，今仗踢法進取，開賽6分鐘就由中場伊薩辛遠射入世界波打開紀錄，但拿玻里好快憑拉斯柏度尼入波扳平。換邊之後，拉素後衞阿當馬路錫擺烏龍，令拿玻里反超前，以為可以全取3分，但踢到87分鐘，拉素由後備上陣嘅保拿爾迪亞射入逼和2比2。

拿玻里繼同羅馬、烏甸尼斯打和1比1之後，連續3場聯賽都係領先之下被對手逼和，失咗6分。賽後拿玻里教練干地表示，球隊人腳不整，今場仲有馬斯索治傷出打亂部署，和波算可以接受。

至於第3位阿特蘭大亦失分，主場打和卡利亞里0比0，落後拿玻里5分。另外，AC米蘭憑新加盟前鋒辛迪亞高基文尼斯頂入空門，主場以1比0擊敗維羅納，呢位23歲墨西哥國腳為A米踢2場聯賽都有波入。