艾摩廉搶購愛將　昆達同意加盟曼聯

根據英國媒體《TEAMtalk》爆料，曼聯今夏增兵計劃有重大突破，效力葡超勁旅士砵亭嘅17歲翼鋒基奧雲尼昆達同意加盟紅魔鬼，希望跟隨「前老細」魯賓艾摩廉搵食，據悉曼聯只需要用5,000萬鎊(約4.9億港元)轉會費，就可以買到呢位「新C朗」。

魯賓艾摩廉崇尚343陣式，對於邊路球員要求非常高，早前已簽入萊切左翼衞柏德列多古，未來增兵會向翼鋒球員埋手，目標人物包括艾摩廉執教士砵亭時期嘅愛將基奧雲尼昆達。呢位新星可以勝任左右翼鋒，今季為士砵亭上陣37場入2球，上年8月已晉身葡萄牙國家隊，被譽為C朗接班人，引來各大球會注意。

基奧雲尼昆達現時合約嘅毀約金為8,300萬鎊，但估計曼聯只需要出5,000萬鎊就可以令士砵亭放人。曼聯以往同士砵亭有唔少重要交易，包括收購C朗、拿尼，近年有般奴費南迪斯，昆達可能見到幾位前輩效力曼聯取得成功，所以都想成「魔」。