頂得住！下半場0射門　利物浦險勝狼隊

英超「1哥」利物浦近期出現疲態，周日(16日)主場迎戰護級份子狼隊，下半場被圍攻出現尷尬「0射門」數據，好在最終都守住2比1勝果，榜首領先優勢維持7分。

利物浦由路易斯迪亞斯同穆罕默德沙拿入波，37分鐘就領先2比0。狼隊之後極力反撲，利物浦中堅伊巴希馬干拿迪完半場前爭議性走甩紅牌，半場期間即被換走。

下半場狼隊愈戰愈勇，馬菲奧斯根夏67分鐘追番1球，利物浦之後退守捱打，好在最後都頂得住，即時下半場錄得21年來首次半場「0射門」，仍然取得2比1勝利。

狼隊領隊祖奧彭利拿賽後不滿表示：「我唔係球證，但我認為干拿迪應該要拎第2面黃牌，不過依家講乜都冇用啦。」

利物浦領隊施洛亦承認換走干拿迪，係驚佢出事：「干拿迪第1面黃牌太嚴，或者球證都有呢個感覺，所以冇出第2面黃牌，但之後球員同球證都會有壓力，所以我將佢換走。」