【有片】莫迪歷超級金球 皇馬2比0贏基羅納
周一(24日)凌晨西甲賽事，皇家馬德里主場2比0擊敗基羅納，追到同榜首巴塞隆拿同分(54分)，1分領先第3位嘅馬德里體育會，冠軍爭逐非常激烈。39歲老將莫迪歷今場轟入超級世界波，成為皇馬嘅贏波英雄。
皇馬今場贏形勢但遲遲未入波，直到41分鐘角球攻勢被解圍，捕喺禁區外嘅莫迪歷心口控定，即刻起右腳窩利轟入死角，為皇馬打破僵局。換邊後皇馬攻勢浪接浪，到83分鐘再由雲尼斯奧斯祖利亞建功，鎖定2比0勝局。
喺祖迪比寧咸停賽下，莫迪歷今仗喺中場主宰大局，除咗入超級金球，亦有92%傳球成功率同6次關鍵傳送，賽後獲選為最佳球員。皇馬教練安察洛堤賽後表示：「莫迪歷係上天畀足球嘅禮物，如果佢願意，就應該繼續踢落去，佢嘅表現無可挑剔，同佢合作係一種幸運。」
西甲爭霸3強鼎立，第4位嘅畢爾包亦只係落後6分，係西甲18年來第1次喺25輪聯賽過後，出現前4只有6分差距嘅亂局。