【官宣】燕豪芬簽阿仙奴舊將　歐聯冇得倒戈？

荷甲勁旅燕豪芬周日(23日)宣布，簽入自由身嘅西班牙前鋒盧卡斯佩雷斯，呢位36歲老將曾經效力過阿仙奴，可惜近年成為「人球」，今次雖然加盟燕豪芬，但因為已過咗歐聯註冊時間，所以無緣喺16強倒戈鬥阿仙奴。

盧卡斯佩雷斯15/16球季喺拉科魯尼亞成名後，獲阿仙奴用1,700萬鎊收購，不過嚟到英超表現令人失望，只為阿仙奴踢過21場比賽，代表作係2016年歐聯連中三元，助阿仙奴4比1贏巴素利。呢位前鋒之後效力過韋斯咸同西甲多間球會，上月同拉科魯尼亞解約回復自由身，今次加盟燕豪芬係佢職業生涯第14次轉會。

燕豪芬喺歐聯16強會對阿仙奴，不過球員名單喺月初已經提交，意味盧卡斯佩雷斯只能夠喺本土比賽上陣，將會着27號波衫嘅盧卡斯佩雷斯表示：「我急不及待要落場，向球迷同隊友證明自己能力，我仍然好有野心，希望用好多入波同助攻，幫助球隊達成目標，包括贏荷甲冠軍。」