曼聯任命新「轉會總監」　買人唔手軟！

日前宣布再次進行大裁員嘅曼聯，據報已正式任命前車路士總監韋維爾做新任「轉會總監」。韋維爾上年夏天以「臨時工」身份加入管理層，原本合約季尾完結，但隨住體育總監艾舒禾夫被炒魷，曼聯就決定以韋維爾「扶正」，不過今次簽長約就要進行減薪，嚟緊會專責處理轉會事宜。

韋維爾上年加盟後，主要負責物色年輕新星，包括簽入18歲馬里中場施高干尼，依家佢升職掌握轉會大權，將會直接向技術總監韋確斯匯報工作，包括整頓球探系統。38歲嘅韋維爾經驗豐富，之前喺賀芬咸、RB萊比錫同車路士工作過，表現獲得肯定。

韋維爾喺2022年底獲車路士聘用，但只係7個月就被班主保利踢走，佢唯一處理嘅轉會窗就係2023年嘅冬天轉會窗，當時車路士瘋狂掃貨，包括用過1億鎊收購安素費南迪斯、梅迪歷，仲簽入馬度基、班洛特巴迪亞舒尼、馬路古斯圖、安迪利山度士同祖奧菲歷斯等等，買人絕不手軟。