夏蘭特率曼城打爆熱刺　8隊搶前4空前激烈

英超前4競爭空前激烈，曼城周四(27日)凌晨憑傷愈復出嘅艾寧夏蘭特一箭定江山，作客1比0擊敗熱刺，重返聯賽第4位。英超依家由第3位嘅諾定咸森林(48分)至第10位嘅阿士東維拉(42分)，8隊只係相差6分，前4爭奪戰相當緊湊。

曼城前鋒夏蘭特對上2場因傷缺陣，球隊接連輸畀皇家馬德里同利物浦，呢位挪威射手今場傷愈復出，12分鐘就喺禁區捕靚位近門掃入，呢球係佢今季第20個聯賽入球，連續3季英超「20+」入波。夏蘭特補時階段再有入波，但疑似手球在先被VAR作廢，曼城最終仍然贏1比0。

曼城贏波後有47分鐘升上第4位，不過依家第3位至第10位之間僅得6分差距，餘下每一場聯賽都不容有失，領隊哥迪奧拿賽後表示：「我哋今季都唔會見番昔日嘅曼城，因為昔日嘅曼城太超班，不過我哋會返嚟，我哋有支好年輕嘅球隊，加上未來嘅收購，會引領曼城喺未來幾年爭霸。」