無鋒阿仙奴全面死火　0比0和森林寫羞家紀錄

「無鋒」阿仙奴喺英超繼續淪陷，周四(27日)凌晨作客被諾定咸森林悶和0比0，近2場聯賽33次埋門未入1球，係「兵工廠」自2023年5月後首次連續2場聯賽「食白果」，領隊阿迪達奇招盡出都扭轉唔到頹勢，未來1個月有排捱。

布卡約沙卡、夏維斯、加比爾馬天尼利同加比爾捷西斯4大攻擊手全部受傷下，阿仙奴再次用中場米基爾馬連奴客串中鋒，左閘卡拉費奧利亦頻頻推上前線，全場最佳機會就係佢喺禁區內過人後熨射中柱，最終都係入唔到波，最終悶和0比0，同第3位嘅森林仍然保持6分距離。

阿仙奴領隊阿迪達賽後表示，正嘗試用唔同球員分擔進攻：「我哋根據球員特點做調整，希望創造更多唔同進攻方式，令唔同類至球員都可以製造威脅，球隊要盡力去適應。」不幸嘅係，阿迪達表示最接近復出嘅馬天尼利同沙卡，都可能要等到3月底國際賽期之後先回歸，呢個3月要繼續頂硬上。