「小雲」首當皇馬隊長　贏皇蘇98%入決賽

周四(27日)凌晨西盃4強首回合，皇家馬德里有雲尼斯奧斯祖利亞首次擔任隊長，半力出擊下作客1比0擊敗皇家蘇斯達，次回合返主場形勢大好。統計顯示，皇馬歷來喺西盃48次首回合作客贏波，有47次都順利晉級，再入決賽機會高達98%！

皇馬今場半力出擊，盧卡斯華斯基斯、莫迪歷、費達歷高華維迪同泰拔高圖爾斯都冇做正選，令雲尼斯奧斯得以首次擔任皇馬隊長。皇馬今場憑住巴西前鋒安迪歷早段一箭定江山，首回合領先1比0。美中不足係中場丹尼施巴路斯完場前膝部受傷喊住離場，預料養傷時間會「以月計」。

首任隊長嘅「小雲」賽後表示：「可以以隊長身份帶領世界最偉大球會踢4強，係我從來未諗過嘅夢想，我希望一直為呢間球會創造歷史。皇馬依家狀態係今季最好，我哋想喺球季完結嗰陣得到盡量多嘅冠軍！」